حچاية التنگال

سعد العبيدي

بعد السادة النواب لدولة الرئيس توّهم وصلوا، وقسم منهم بعده حتى ما مستلم السيارات والحمايات والحباشات. وبأول اجتماع إلهم بمجلس الوزراء، وبعد أن تصدروا الگعدة بصف الرئيس، واحد منهم، وحسب الحچي الي تسرب، حچاها طگ بطگ وگال للرئيس، بثقة نائب محروگ گلبة، وتوه جاي من الميدان:

تره ما يصير وحدك تقود الحكومة. إحنا، ويقصد باقي أخوته من النواب، هيئة رئاسة، والقرارات لازم تتخذ بالإجماع أو الأغلبية. يعني أكو هيئة أو مجلس رئاسي غير مجلس الوزراء، تنطرح عليه المواضيع والمشاريع وكلشي وكلاشي، وبعد الموافقة عليها بالأغلبية، تروح لمجلس الوزراء، هم تنطرح، وتتناقش ويتصوت عليها بالأغلبية. وإذا كان هذا الحچي صدگ، فأولًا: جيب ليل وإخذ عتابة. وثانيًا: يبين الجماعة ماشين بطريق الخنگ سكتاوي. وثالثًا: العراق قدم صورة جديدة للديمقراطية وإدارة الحكم، ما موجودة بكل الديمقراطيات العتيگة، والي لازم تتغير حسب الرؤية العراقية. أما الوزراء في هذه الديمقراطية الفريدة، فلازم يگعدون ويسكتون، ما إلهم لازمة... ينطبق عليهم المثل الشعبي: «خذتك رجل يگعيم عن وحشة الليل»