حچاية التنگال

سعد العبيدي

الحچي الخاص بتغيير سعر صرف الدينار من 1320 إلى 1520 يبين صدگ، يعني حوالي (15 بالمئة) من رواتب الموظفين، وأجور العمال، وعوائد الفلاحين، وتقاعد المتقاعدين ليگدام راح يطير، وبگده هم يطير على فروقات أسعار السلع والخدمات، لأنها راح تزيد، والفقر والحرمنة والفساد تكثر وتزيد. وعلى هذا الديدان يا حميدان، يجر سربس الثمن الي يدفعه الشعب من عيشته ورفاهيته ومستقبله، كنتيجة لأخطاء السياسة وچفصات المسؤولين.

زين شنو ذنب العراقي لمن الحكومة السابقة تلغي فكرة مد خط أنابيب لتصدير النفط إلى ميناء العقبة مثلًا، لأن واحد ساند الدولة خوش سند يهدد بتفجير الأنبوب؟

وشنو ذنب الناس يتحملون كلف حماية المسؤولين، ونثرياتهم، وبانزين سياراتهم، وعمليات بواسيرهم؟ وليش يتحملون كلف التعيينات الغلط، وتشريع مناصب غلط، وعسكر يفترض أن يحمي البلد يحطوله حماية غلط، و...؟ خو بلا ما تجون على الإنسان الي انتخبكم وجابكم وتدوسون على رگبته، تعالوا على نفسكم اشوية. حدوا من التبذير، وقللوا من المصاريف، ولا كل سنة تعيدون تبليط الرصيف. تدرون العراقيين بلندن يگولون أكو بالسفارة 23 مستشار، وبالأصل ملاكها واحد؟ ولو تدرون إشگد الواحد يكلف مخصصات، وطب، ومدارس الويلاد، وايجار: چان شگيتوا الزيگ وسبيتوا حتى العنب الأسود.