حچاية التنگال

سعد العبيدي

اشلون تمشي الدولة وبيها واحد يطلع ويگول: مطار النجف لازم يبقى مفتوح گدام الطيارات الإيرانية بأمر صاحب الزمان، وصاحب الزمان محد سامع منه أمر بهذا الخصوص. واشلون تستمر هاي الدولة بمسيرتها، ويطلع بيها رجل دين، يگول: ما يجوز تسد المطارات العراقية بوجه زوار الامام الحسين. وبصفه سياسي يأكد ويگول: عدم جواز السد، لأن إذا ما يجون الزوار يتأثر الاقتصاد.

هسه وبغض النظر عن رأينا بالعقوبات الأمريكية، وأذيتها للشعب الإيراني، لكن تعال گلي إذا إنت عصيت أمريكا، وما نفذت أوامرها، ودَخْلَتكْ بدهليز العقوبات، منين تصرف على الأكل، ومنو يجيبلك سيارات التاهو؟ واشلون راح توصلك حقوق الخمس بالدولار من بره؟ ثم شنو الي مستفاده العراق من الزوار الايرانيين؟ أشو يجون بطيارات إيرانية، وياكلون ويشربون وينامون ويفركولهم ببلاش، وفوگاها قسم منهم جايبين وياهم ممنوعات يبيعوها حتى يطلعون زيارتهم ببلاش.

عمي عوفوا الدولة بحالها، والتهوا بقضايا: التشطيف، والحوريات، والغلمان، والنجاسة، أسلم إلكم وللدولة. تره الدولة واگفه على گرن ثور.