حچاية التنگال

سعد العبيدي

حل المشاكل ويّه سوريا والتقارب منها زين، ونتيجته منفعة واستقرار وأمان لصالح البلدين، والتبرع من الچيس الخاص لمرقد السيدة زينب بخمس ملايين دولار، ومثلها خمسة للجامع الأموي كلش زين لأنه سلوك بعيد النظر يمكن ان يهدأ النفوس، ويقلل من التناحر والتفاسير الغلط الي عشعشت بالعقول بين المذهبين. لكن راح يخلوه، ما أعتقد يخلوه، فالعلاقية مع سوريا من تأسست الدولتين تمشيلها سنة سنتين زينه والسفر بالهوية وتجارة وسياحة وتحسين نسل، وبعدها عشرة عشرين سنة تخرب ويبدي الدس والتآمر والضرب تحت الحزام، لأن الدولتين ضعيفة وتتأثر بتدخلات الجيران واشلون جيران مناك إسرائيل ومنا تركيا وإيران، ولأن النظم الي تدير الدولتين تركيبتها خطأ، بسهولة يجتهد بيها فصيل ثوري أو مجاهد ثوري هنا أو هناك ويشوف الي دا يصير خطأ، ويباوع أي مشروع بين البلدين بعين الشك والخطأ، ويطلع يهدد ويتوعد ويفرض، ويرجعنا لنقطة الصفر. وما شاء الله الدولتين مليانه مجاهدين.