الى الشاعر الراحل سمير صبيح

محمد المحاويلي

تلهث من لكيتك شايل الرايه

وصدّكتك بكلبي وشفتك امرايه

مثل طيب الشلب عنبر تفوح ابليل

ومثل راعي الغنم يتونّس ابنايه

ربيتك بديه اصياغه اصوغن بيك

صرت قمة محبه وللشعر ثايه

تظفر بالحرف ظفر الكصيبه اعناد

ومن ترسم الصوره بيع واشرايه

انت من الزغر متعني للمركاض

ونيشانك يجيس الهدف والغايه

صبرك صبر ناكه ونخوتك بسكوت

عسل عالضوك طعمك سابي الولايه

يجمّار النخل بيك الحلاه والطيب

وامرورة دفو وجفك امحنايه

تفزع للوطن عاري بشتا اجويريد

مهابه بصرختك. تسكت الحجّايه

من تغتاض تبرد من تفور اتهيج

كاسَر مستحه ويتباها بفيايه

يمرجوحة يتامه امسرفن الذرعان

حافي وبالدرب مليون سلايه

مشيت وما خفت واتعلّمت عالصيد

اتنيشن عالكطه وعالصكر  ع الشاهين

مانيشنت يوم وصدت فختايه

دربك للشمس وبنورها اتوضّيت

يشراع السفينه الما نكر مايه

ودّعتك صكر واجناحك الميدان

سمير انت وبعدها بجفّك الرايه

يديوان الشعر يل بيك ننعى الموت

حي بكلوبنا وجيناك وفايه

حي بكلوبنا وجيناك وفايه