تحرگ كل نذل شمسه

أحمد الأمين الجنابي 

 

قبل كلشي النقاش ويايه ممنوع

العاجبته السوالف يحجي وي نفسه

واليعرف الواقع راح يفهم زين

والجاهل شويه نداهر بحسه

محد اعتاد المشاهد حاشى والله

بس مشهد وضعنه من القدس اقسه

الشهادة ينولها الرادت سما تحوي

ربك يدري بينه يشوف ما ينسه

اكو هوايه مشاهد اقسه من الموت

وعقول استحوذتها عقول نگسه

مبادئ دين ديبيعوها جوه السوگ

اجندات وتُطبق باطِناً خِلسه

الما يگدر يفك حلگه بوطن مبيوع

تلگاه عالقدس ديلعلع بحسه

شلون تحرر المحتلها شيخ ابليس

وانت وي الگهوچي شما يحط ترسه

منهوب البلد حتى اليصلي يبوگ

مو بس عالعراق العرب هَم نفسه

صحوه جيل يراد النه بس شلون

اذا كُل القيم صارت قيم نَحسه

مو مَشهد الدم يحرك الناس

تحصيل الحصل هذا الحصل هسه

أُمتك يا مُحمد كلها جاي تضيع

وعباله النشر بس القدس بي نَكسه

إنتكاسه دين عدنه وعالم وشيخ

سم بنص عسلنه الأجنبي يدسه

استغلال القضايا بفلس جاي يصير

يلزگ روحه بيها وهيه متمسه

التجارة بكلشي صارت حتى بالدين

واتحدى الهمس بالحق ولو همسه

نتيجة هذا هسه القدس جاي تموت

ولحم بغداد جاي امريكه تفترسه

وذيج اليمن متروسه الجثث بالگاع

وبيت السوري چان بمكنسة يكنسه

مو ضد المُقاطع والنشر لا

بس ضد المشه بموضوع ميدرسه

وضد الما يميز زين والمو زين

وضد اللي يهمه من الوضع فلسه

وضد الينشر الدم بفلسطين

ويطلع ثاني يوم يفاخر بلبسه

وضد كل قائد يداعي بحقوق الغير

وما ماخذ حقوق اتباعه ولنفسه

وضد كل الاغاني البيها ثوريات

والواقع تماماً يختلف حسة

وضد اللي ركب موجة وعرمرم صار

القدس مال الإسلام القدس مو قدسه

ونصيحة لنفسي ثُم لجيلي الأقران

بس الله العظيم الواجب نقدسه

ونحتاج التعمق حيل بالتفكير

وكلمن يبدي من أغلاطه البنفسه

اذا غابت شمس ذيج البطولات

باچر جيل تحرگ كل نذل شمسه