حچاية التنگال

سعد العبيدي

يگول آني أدرى بأعضاء البرلمان وسوالفهم، حافظها عن ظهر قلب، هو صحفي، يتخشخش ويعرف كل الدروب المؤشرة، وغير المؤشرة. ولمن سألوه إي وبعدين، نعرف انت تعرف، بس غير تگللنه شنو الي تعرفه، حتى نسميك العارفة. تنحنح وگال أعضاء البرلمان بهاي الأيام مرعوبين ما ينامون الليل، خايفين من أن ينشملون بقوائم الفساد، وحايرين بالي جمعوه وين يودوه، البنوك ما تستلم، والچلاب الي تشتم الفلوس المدفونة دخلت الخدمة، ومن خوفهم بدا قسم منهم يحط الي لغفه أمانة عند أقاربه وأصدقائه المقربين. رد حسان بلكت يصير بيهم مثل ما صار بالوزير، فسأل عبد الله ليش اشصار للوزير.

الوزير يا محفوظ السلامة والبگه، ذكي ويتحوط للبعيد، فراح حاط كل الي جمعه بآخر سنه خدمة وزارية (150) مليار دينار عند الحماية مالته، وهو من أقاربه ويثق بيه، ليش مو بليلية بيضه هذا الحماية انطاكم عمره وهو بعده شاب، وعرفوا أهله عنده هلگد فلوس، فگالوا إحنه نتقاسمها ورث حسب الشرع، وأخوكم الوزير صار مثل بلاع الموس، لا بيه يشتكي ولا يگدر يحچي، وعرض عليهم ينطيهم  الربع من طيب خاطر، ويرجعوله الباقي، ولحد الآن ما موافقون، يگولون هاي إجتنه هدية من رب العالمين، حلال وحق شرعي لازم نتمسك بيه. صفن عبد الله وگال حيل وبأبو زايد، الي ياكله العنز يطلعه الدباغ!!