حچاية التنگال

سعد العبيدي

عفيّة حكم إسلامي وبالتحديد الإسلام الشيعي، وبدون انحياز وزعل، دا انشوف من يوم ما أخذوا الحكم من علاوي بالغش القضائي، ما حلّوا أي مشكلة، وبالعكس وبدل ما يحلون مشكلة، صاروا يزيدون عليها كومةْ مشاكل، وهاي خلصنه ثلاثة وعشرين سنة، وطبينه بالأربعة وعشرين، وإحنة بدوامة مشاكل، بحيث بعدنا ما نطلع من مشكلة، نلگه نفسنه محشورين بمشكلة فمثلا: الكهرباء ما زالت مشكلة، والسلاح بيد الزعاطيط مشكلة، والنزاهة أكبر مشكلة، هاي غير الأمن، والاغتيالات، والبطالة، والازدحامات، والانحياز، وتكدس الرتب والترفيع، والطلاق، والمخدرات، والدعارة، والجهل، والامتحانات، والكليات الأهلية، والصحة العامة، واحتكار المناصب الأمنية، وفوگ هاي كلها إنوب إجتنه مشكلة جديدة، هي تلوث مياه الاسالة في بغداد العاصمة، وأغلب المحافظات الجنوبية... ومو بعيد هاي المشكلة تطلع وراها مشكلة جشع لجهة تريد تصرف تجارتها بمي البطالة براس العراقيين الي تعودوا كل تاريخهم يشربون من مي الاسالة. ومشكلتنا أو مصيبتنا هي أن عداد المشاكل راح يبقى يعدّ ما دامم نفس الوجوه الي سخروا الدين للحكم باقين بالحكم، وما دام أكو من ينتخبهم ويريدهم يبقون بالحكم منا الى يوم الحساب، باعتبارهم أولياء، يمكن أن يشفعوله لدخول الجنة.