حچاية التنگال

سعد العبيدي

وتستمر سفينة حكومتنا تبحر بمحرك هجين، لا هو امريكي صاغ سليم، ولا هو إيراني أصيل، ومع هذا هي تبحر، وعدها إصرار أن توصل للجرف، والإصرار مو غلط، ولكن حتى توصل لازم تقنع الوادم انها تگدر توصل، وأول ما قدمته بطريق الاقناع الصعب والطويل هو المنهاج الوزاري، والي يباوع هذا المنهاج زين، راح يشوف فقرات منه مستنسخة من مناهج وزارية سابقة، وهذا يعني ان الي كتبوا المنهاج مو اسطوات، ولا بذلوا جهد حتى يحطون منهاج يلائم هاي السنين الي هي غير ذيچ السنين، ويعني تكرار الفقرات أو استنساخها طبق الأصل ان الحكومات السابقة لنفس الجهات المشاركة بالحكم حاليا فاشلة وراح تفشل لان نفس الوجوه ونفس الافكار.

ويشوف غالب الفقرات نظرية مثل (حصر السلاح بيد الدولة) أي مو حتى الزعاطيط زهگت من السلاح، وتريده بيد الدولة، فغير تگولون للناس وللعالم اشلون راح تنزعوه لهذا السلاح، إذا أصحابه همه الي يعينون الحكومة وهمه الي يصوتون على قرارات النزع... هذا التمطمط والتسويف النظري بالسياسة يدفع الناس أن تتمنى يتدخل أي واحد حتى يجبر الجماعة على النزع حتى لو كان مكروه او عدو.