حچاية التنگال

سعد العبيدي

أكو أحداث تصير بمجتمعنا وهي وإن كانت حالات فردية، لكنها تأشر هواي من الانحرافات، بالأمن النفسي الاجتماعي: ضابط شرطة يتزوج بنية مطلقة عمرها عشرين سنة، وعدها بنية من زوجها السابق، يعْقِدْ عليها عند السيد. ويعيش وياها هي وبنتها وشاب على أساس أخوها، ست سنين على هذا الديدان دهن ودبس، وأكل وشرب ونوم بلاش. الا أن فد يوم غابت هي والجوق مالها، وحضرته من كل الاتصالات، فاكتشف بنباهته الشرطوية ومهنيته الأمنية: أن الموجود وياها مو أخوها وإنما زوجها، وهي مو مطلقة، وچماله مشهوره بوسائل التواصل وعدها متابعين، وتقدم نصائح للشباب من البنات والبنين.  ليش الأخ لگ صوابه وسكت؟ راح يگاومها عشائريا يريدها ترجع اله، وهي تگل للشيخ لو يموت ما ارجعله. عدنان هم ضابط يگول متشوفون أمنا تره للي، وشارعنا عكرف لوي!!