حچاية التنگال

سعد العبيدي

مهما يكون حجم الفساد بدوائر الدولة، تلگه موظفين نزيهين وإديهم نظيفه من بداية مشوارهم للأخير. وإشگد أكو قذارة وأكوام من الزبالة منتشره هنا وهناك، يمكن أن تنبت بنصها ورده جوري تشم ريحتها من بعيد. وإشگد أكو شيوخ لگف يزيدون النار حطب، نشوف بيناتهم شيوخ أصلاء يحچون الحق ويحافظون على بقايا قيم قربت تنداس. وإشگد أكو رجال دين دجالين، لا يحللون ولا يحرمون، أكو بيناتهم تقاة يخافون رب العالمين ولو قليلين... رباط السالفة بوسط كل هذا الخراب الي أصاب النفوس في البلاد، والتخلف الفكري وتعفن الوعي الجمعي، يطلعون شباب من بغداد يشترون مئات من طيور البط الي بعدها صغار، ويروحون بيها الى نهر دجلة، يطلقون سراحها هناك... فكرة على بساطتها حلوة ونبيلة تأشر سلامة نفوس وحب للطبيعة الي لا يمكن أن ترجع متوازنة مثل قبل إذا مو الناس تطلع تدعم وتشجيع هيچ مبادرات ما تجي على بال أحد إلا المتميزين.