وطن وما بيه ريحة جاني.. احساسي بيه من احساسك

زهير جبر

 

يمته ونرجع فيَّ للثاني؟

اتلمس كل ليلة جروحك

وانته اتفتگ ما تتناني

بين احلامي وفزعة يومي

ودفتر مكتوب بعنواني

اسال عن شارع وگفتنا

عن أم تنشد عن احزاني

عن ديوان وبيه لمتنا

عن غربه وموت الخلاني

خل نعيش بدون مغالب

لا اني احفر حفره تغيضك

ولا انته تكثّر اشجاني

لا شاجوري يطگ بابك

ولا تنحر كل يوم اعواني

بين عيوني حسرة  وعينك

كون ادمّع من تلگاني

كون نعيش الماضي الأجمل

نترك كلشي يَمُوتْ الغبشه

وما نرجع نحقد عالثاني

خلينه نحس احنا الحالة

من واحد يتهدم بيته

تصبح كل الدنيا احزاني

يا هور وبيه نشغة بردي

ويا غربيه بناي الحاني

احنا اثنين بجسد واحد

وطن وما بيه ريحة جاني

كافي نعيش الغربه واحنا

مثل الشمعه واحدنا ينور للثاني