أختي والتاتا

فرح كاظم السلمان

هيجي وكت بالتسعينات ايام الزمن الجميل چانت اختي مهندسة بوزارة الاسكان بشارع الرشيد وچان عدهم خط «تاتا» متهالك بدون تبريد للموظفين ينزلوها على الشارع العام وترجع الباقي مشي لبيتنا. طبعاً بذاك الوكت مجان ماشي بنية تشيل شمسية علمود الشمس بس اختي حطمت جميع اشكال الرهاب الاجتماعي واصرت تشيلها الى ان تدخل البيت ضاربة عرض الحايط كل البرستيج مال ذاك الوكت. وبنفس الوقت كانت من الليل تترس الطشت مي علمود ثاني يوم من ترجع يكون المي بارد لان تعرفون بذاك الوكت مجان اكو تانكي مغلف وچانت التانكيات رقيقة جداً وتتخلى بالسطح العالي حيث تصگع بها الشمس.

اتذكر جيداً شكل اختي (وهي بيضاء البشرة وليست بزرگة مثلي) وهي تدفع باب المنزل لاهثة من الحر بدون سلام ولا كلام ووجهها بلون الطماطم فتهرع راكضة الى الحمام في الطابق الثاني وهناك تكب العيطة بعد اكتشافها ان احد اخوتي استحم بمائها البارد! هاجرت اختي الى امريكا وفي الشتاء الماضي ارسلت لي صوراً حيث الثلوج تغطي المنازل والشوارع مع استحالة الخروج من المنزل.. فقلت لها:

اوووع گلبي انقبض.. عيني حر شمسنا ولا هيجي ثلج!

اليوم صباحا اتصلت بها اسألها عن كيفية التقديم على الهجرة.