00964 790 110 7676     azzaman_iraq@yahoo.com
  مقولات من لا چاره

مقالات
أضيف بواسـطة admin
النـص :

مقولات من لا چاره

شامل حمد الله بردان

 

 

ظهرت طبقــــــة ملاك جــــــــدد، وشنو يعنـــــي؟ بالعافية، كل واحد اينام بگبره، اذا شريف للجنة و اذا حرامي وقاتل، الله يقتص، يالله مشي.

اكو ناس نهبت بالسقوط؟

والله هو النهب انواع، قسم شفنا و قسم لا، اكو ناس تحلل البوگ، ايگولون نسوي خير بعدين، والله غفور، يالله مشي.

ناس زورت وثائق؟

هو زور وهو يتحاسب، وانته شعليك؟ عود من يزورون وثائقك وتعرف ثور، واخذ حقك، يالله عادي.

فلان استولى على بيت علتان؟ وعلتنان عمك خالك؟ خلي علتان يشتكي على فلان، لا تتدخلون بشي مو مالكم.

وحده من ربع صدام وصارت اليوم مسؤولة؟ اي عادي، تابت، وتوبتها صادقة، انتوا ميعجبكم العجب و لا الصوم برجب.

لوگي؟ عود من يتلوگلك لا تقبل، خطيه، يتلوگ لواحد اليوم مهم، عمي الناس هيچ من ايام نوح، بس انته عبالك عيب، العيب بالجيب، مو هيچ چانت الوادم اتگول؟

يتحارش بالنسوان؟ واكو نسوان تتحارش، خلي يولي، هو فد واحد ميعرف حدوده، فد يوم اتصحله وحده بارع اتأدبه، انته معليك.

البلد وضعه غير مستقر؟ قابل بلد الخلفوك؟ وانته شنو؟ رئيس انته؟ مرجع؟ انته خلگ واحد، عود من يطلبوك حتى اتخلي البلد يستقر گول ما اريد.

انته ليش متاكل و توصوص؟

ويص ويص، مثل الكتاكيت، اتريد اتصير حقاني وخوش ادمي، وتخاف الله؟

شوفلك مكان بعيد عن الناس، لان، الناس، اتريد كل شي، ومتريد واحد ايگللها على العين حاجب، مدام ايبوگ و محد يحاسب، ويچذب ومحد ايرده، معناها قوي، والقوي، وراه ناس، والناس اتريد فلوس، والفلوس عد القوي، والقوي مو وحده قوي، الاقوياء اليوم هوايه، بس القوي لا ادور عليه بين الفقراء، ذوله يردون خبزه وثوب و دوه ويمشون مدنگين، القوي، كل شي يگدر يسوي، بس ميگدر ايجيب الشمس من مكان الغروب، فمشي امورك، والله كريم.

يعجبكم هذا الحچي؟

حتى لو مشيناه راح تطلبون اكثر، الله لا يوفقكم.

 

عدد المشـاهدات 50   تاريخ الإضافـة 17/07/2019   رقم المحتوى 30969
تواصل معنا
 009647901107676
 azzaman_iraq@yahoo.com
الأربعاء 2019/8/21   توقيـت بغداد
تابعنا على